منظومة الفاكيوم

Nubira Lovers

23 مارس, 2017

السلام عليكم جميعا:

نظرا لطلب مجموعة من السادة الاعضاء مني شخصيا طلب اعادة شرح منظومة الفاكيوم في العربية كاملة بشكل اكثر وضوحا وخطوة خطوة
بسم الله نبدأ
ببساطة شديدة ابتكر صانعوا السيارة طريقة جديدة سهلة وتافهة جدا وعبقرية في نفس الوقت وهي

vacuum system
او

Turn on accessories by negative pressure
باختصار عندما يدور الموتور ينتج عنه قوة شفط او ضغط عكسي او فاكيوم تقارب من 16 الي 20)hg)
millimeters of mercury absolute

الشفط ده. امكنهم من خلاله تشغيل مجموعة حساسات واجهزة ملحقة كلها تخدم تحسين اداء الموتور علي مختلف السرعات والاحمال
كل العملية دي بتم في شئ اسمه المنافولد. او الثلاجة كما يطلقون عليه بالخليج وله اسماء اخرى المهم مبدئيا كده لازم المنافولد يكون محكوم ولا يوجد به اي تسريب هوا {intek manifold } علشان يستقر دوران الموتور ويوفر لبقية الملحقات والحساس مناخ سليم للعمل فيه
تجد اهمها وهو الحساس العملاق في عمله الmap
وبدونه لن يستقر دوران الموتور اساسا وحيبطل دوران في بعض الحالات وكلكم عارفين انه حساس الضغط المطلق ووظيفته وكل شئ عنه في موضوع طويل ليا شخصيا علي المدونة الخاصة بالجروب وكمان النت مليان مئات الالاف من الموضوعات والفيديوهات التي تبين عمله واحتياجه للشفط او الفاكيوم. بدون الدخول في تفاصيل اخري

ثم بعد تأتي بقية الملحقات اللي قلنا عليها والتي لها عظيم الاثر في رفع اداء الموتور والحفاظ علي السحب. والحفاظ علي وش السلندر تحديدا
بالخصوص هنا في هذا البوست سنلقي الضوء علي خراطيم فاكيوم النوبيرا تحديدا سواء المواصفات المصرية او الاوروبية مفيش بينهم اختلاف جوهري في خراطيم الفاكيوم الا قليل جدا وغير مؤثر في فهم القصة كلها

ملحوظة. كان فيه صورة رسم كروكي عملته من فترة تسهيلا علي من يرغب في تبسيط فهم vacuum system
برضه حستعين بها تاني. ونبدأها واحدة واحدة

الرجاء انظروا للرسم الكروكي وتابعوا الشرح للنهاية

خرطوم فاكيوم رقم 1
ده خرطوم راكب علي منظم الفيجسvgess كما بالصورة وواصل من الناحية الثانية بسنوليد الفيجس وسينوليد الفيجس واصل بخزان صغير اسمه خزان الفيجس عن طريق خرطوم صغير جدا لا يتعدي طوله 3 سم وبعدين الخزان واصل بالخرطوم الفاكيوم رقم 2. اللي واصل من الناحية الثانيه بهوز علي المنافولد مباشرة كده تمام
طيب نقف هنا شوية علشان نعرف ايه فايدة الكلام اللي فات ده كله وايه فايدة منظم الفيجس وخراطيمه وسينوليد بتاعه وخزانه والليلة دي كلها وازاي اعرف ان المنظومة. Vges كلها شغاله
عند بدء دوران الموتور علي السرعة الخاملة بيكون قرص البوابة مغلق تماما والخلخلة والشفط الصادر من الباستم. في اشواط السحب علي اشده وبيكون المنافولد بيتعرض لاشد وقت فيه خلخلة او ضغط عكسي او فاكيوم. هنا الهوا لما بيدخل من صمام الايدل بيكون سريع وشديد. و بعد قرار قراءة الماب اللي بيقيس الضغط المطلق داخل المنافولد واللي خرطومه علي اول المنافولد من ناحيه البوابة باعطاء اوامر للكنترول بزيادة زمن فتح الرشاشات ليتناسب مع الهوا اللي داخل في السرعة الخاملة
هنا بقي وجد الصانعون ان عمل دوامة للهوا اللي داخل وتطويل مسار رحلته داخل المنافولد ووصوله الي صمام السحب وغرف الحريق حيبطئ من شدة الخلخلة. وحيقلل من قراءة الماب وحيقتصد من استهلاك الوقود لان. المسار الطويل والدوامة حيخفف الضغط العكسي. الي حد ما وحيعطي عزم مناسب للسرعات الخاملة والبطيئة واول المتوسطة
اللي بيسموهtorque mode. او وضع العزم
او العزم اولي في السرعات الخاملة والبطيئة وهي نظرية معرفه ولن يتم هذا الا بوجود منظومة vgess. واللي بتشتغل كالآتي عند الفاكيوم الشديد يتعرض الخرطوم رقم 2 بالصورة لفاكيوم وبالتالي ستحدث خلخلة كبيرة بالخزان الصغير والواصل بخرطوم صغير {3سم} بالسينوليد. يقوم شافط طرف التلامس الارضي Gnd. ويجذبة تجاه كونيكتور صغير فتكتمل الدائرة الكهربائية. للسينوليد الكهربي ويقوم السينوليد فاتح. On وموصل طريق فاكيوم لمنظم الفيجس عبر الخرطوم رقم 1 فيقوم الفاكيوم ساحب رق الرداخ والذراع المعدني اللي في اسفل المنظم اللي متثبت فيه عتلة محورية تتحكم في قضيب حديدي مثبت علية اقراص البوابات الاربعة الداخلية للمنافولد فتقوم قافلة مسار الهوا القصير في المنافولد وتمنع مرور الشفط عبرها ويضطر الهوا والتخلخل يعملوا دوامة ويطول مسارهم ويمروا في طريق اطول مسارا اللي هوا الانتفاخ الملحوظ. في المنافولد. وهنا يتحقق المطلوب واللي اشرت اليه سابقا
كده تمام
يظل الوضع هكذا والبوابات مغلقة حتي يفتح قرص البوابة شيئا فشيئا ويقل الضغط العكسياو الفاكيوم داخل المنافولد ويصبح مقاربا للضغط الجوي خارج المنافولد. هنا فقط وبالتحديد بعد 3000 rbm فما فوق ينهار الفاكيوم الشديد بصورة كبيرة ولا يقدر الخرطوم رقم 2 علي استمرار الشفط فتزول قوة الشفط من الخزان وبالتالي يزول الشفط من علي الكونيكتور الكهربي فينفصل الطرف الارضي gnd وينقطع التيار عن السنوليد فيقفل مسار الفاكيوم وبالتالي ينقطع الفاكيوم بدوره عن الخرطوم رقم 1 ولا يجد الرق بتاع منظم بلف الفيجس قوه تشفطه للامام فينرل للاسفل دافعا الذراع {يوجد ياي داخل الرداخ} فيقوم الذراع دافع العتلة لتفتح مسار الهوا القصير وفي نفس الوقت تقفل مسار الهوا الطويل
فتعطي للموتور عزم وباور مناسب جدا للسرعات العالية والrbm العالي
وهذه ايضا نظرية معروفة باسم power mode
علي السرعات العالية الباور هورس hp اولي ويتم تجاهل العزم تقريبا
حتي انك تجد كل قياسات اخراج الباور هورس تنتج وتستخرج علي rbmm عالي

كده احنا خلصنا منظم الفيجس وكيف يعمل وايه اهميته ووظيفته علي مختلف الاحمال
طيب انا عايز اعرف اذا كان شغال في عربيتي ولا لأ؟؟؟؟؟؟
اقولك بسيطة خلي اي حد يدور العربية غيرك وانت اقف وانظر اليه وراقبه فقط اثناء لحظة الدوران لازم تلاقيه ذراعة بيتحرك حركة افقية وبيتم جذبه لداخل المنظم نفسه بفعل الفاكيوم علي الرداخ بتاعه كده يبقي تمام عاوز تتاكد اكتر والعربية دايرة شيل الخرطوم بتاعة لازم تلاقيه انزلق العمود ونزل لاسفل وكده تم فتح البوابات زي ما شرحت سابقا
عاوز تتاكد اكتر واكتر من انالسينوليد نفسه شغال ومش عطلان علي وضع الفتح مثلا خلي كل خرطوم واصل زي ما هو وزود جامد ببكرة البنزين لازم حتلاقي الذراع بتاع المنظم بيستجيب للسرعة وارتفاع الrbm والذراع بينزل شيئا فشيئا لاسفل
كده يبقي تمام التمام

الخرطوم الفاكيوم رقم 3 الخاص بالريجليتور بتاع البنزين انا حقول بس بيشتغل ازاي لكن الريجليتور نفسه موجود له موضوع خاص ليا شخصيا علي المدونة ايضا
بيشتغل ببساطة حسب قوة الفاكيوم اللي جاية من المنافولد. لفتح وغلق ومورابة رداخ الريجليتور للسماح للبنزين الزائد عن الحاجة بالرجوع عبر ماسورة الراجع للتانك مرة اخري
فاكيوم شديد = سرعات خاملة وبطيئة = شفط للرداخ = غلق لماسورة الراجع. وتوفير ضغط مناسب للسرعات كثيفة استهلاك الوقود
فاكيوم ضعيف = سرعات متوسطة وعاليه = شفط بسيط للرداخ = فتح شبه كامل لامرار البنزين. الزائد عن الحاجة لماسورة الراجع ومنه للتانك

وهكذا في تباين مستمر. هههههههه وكان فيه هنا واحد حبيبي قوي في الجروب كان عمل له فكرة عبقرية وتعديل بسيط وناجح وهو عارف نفسه كويس ههههههه

خرطوم فاكيوم رقم 4 ده لحساس الmap
وانتو عارفين الجيل الثاني من حساس الماب والذي نملكه في الدايو متصل بخرطوم بالمنافولد

خرطوم فاكيوم رقم 5 ده واصل من المنافولد في مرحلة ما بعد البوابة مباشرة الي علبة فلتر التكييف وهو متصل بالفتحة السفلية تحديدا واللي مكتوب عليها حرف S اختصار solenoid سينوليد. يعني شغله هو هو شغل السنوليد بالاضافة الاستفادة من الفاكيوم لتحويل وتغيير طريقة توزيع الهوا للتكييف داخل الصالون عن طريق فتح وقفل بوابات داخل التابلوه

خرطوم فاكيوم رقم 6 و 8. خاصين بمنظم egr والسينوليد بتاعه
منظم اعادة تدوير غازات العادم
لكن هنا فيه ملاحظة هنا يعمل السينوليد بطريقة عكس طريقة سينوليد الvgess. يعني عند حدوث فاكيوم شديد علي السرعات البطيئة يكون هذا الفاكيوم السبب في فتح الدائرة الكهربائية ووضع السينوليد علي وضع off ولما ينخفض الفاكيوم لارتفاع الrbm فوق ال3000 مثلا يقوم الكونيكوتر في السينوليد قافل الدائرة اتصال للخط الارضي gnd وفاتح السينوليد والفاكيوم شافط رق الرداخ بالاكس بتاع منظم الegr ويقوم فاتح طريق لبعض غازات العادم انها تمر في اكزوز ماسورة استنلس خلف المنافولد ومنها علي المنافولد والي غرف الاحتراق مباشرة والغازات دي شبه خاملة ودرجه حرارتها بتتراوح من 250 الي 550 درجة مئوية بتخش تعمل تبريد مفاجئ لغرف الحريق واللي بتكون درجة حرارتها وصلت لمعدلات حرجة بتتخطي ال2000 الي 2500 درجة مئوية {في هذه الاثناء لا الزيت ولا المية بتسعف تبريد مناسب حوالين غرف الحريق}

فعلشان كده انا شخصيا ببقي مذهوووووول من بعض المهتمين بصيانه السيارات وللاسف مشهورين جدا جدا جدا ولهم قناة علي اليوتيوب وبيبقيوا فرحانين انهم بيلغوا منظم الegr لتزويد الاداء وكأن كل معرفتهم وعلمهم بهذا الegr هو مجرد اعادة تدوير غازات العادم فقط فقط فقط
وميعرفوش انه من ضمن وظايفة الهااااااامة انه مبرد ضروري لغرف الحريق ده حتي في كتب الصيانة اسمه. Cooler كووولر

خرطوم فاكيوم رقم 7 و10 دول خاصين بمنظومة. مبخر البنزين الEvpa وعلبة الكانستر وصمام سنوليد الpcv
Pressure canister valve

برضه المنظومة كلها علي المدونة اختصارا للكلام لمن يرغب

يتبقي اخر خرطوم واكبر خرطوم والذي يحتوي علي سكس بلف {صمام لا رجوعي} وهو خرطوم السيرفوا حضراتكم عارفين. انه يسمح بمرور الفاكيوم من المنافولد الي طقيه السيرفوا ولا يسمح بالعكس مما تقوم عليه فكرة مقوي الكبس للجهاز الفرملي. مما يرفع الاداء الفرملي الي اقصي درجة وبمجرد لمس الدواسة فقط

شفتوا بقي حضراتكم قد ايه شوية فاكيوم مبني علي اساس وجودهم كام جهاز وملحق وحساس يخدم اداء السيارة. ويجعلها افضل
عرفتوا ليه فشلت الدايو هههههههه في ام الدنيا وصنايعية ام الدنيا عندما نزلت هذه التكنولوجيا العبقرية البسيطة اواخر التسعينات لعمال وصنايعية ميعرفوش عنها اي شئ وقتها هما كان آخرهم يلف صنية اسبراتير ويغير ابلتين وكوندنسر ههههههه ويعك ويلك في كبراتير وفواني كاربتير ههههههه
ولما يجي يظبط تقسيمة موتور يفك اول بويجهيه ويجيب مفك وزق يا جدع ورا شوية وقدام شوية

بذمتكم وضميركم الناس دي كانت حتستوعب يعني منظومة فاكيوم ومنظومة vges ومنظومة egr ومنظومة Evpa وعلبة بيئة وانجشكن كامل وحساسات لكل شئ وكنترولات تحكم وobd2
والكلام ده. اذا كان هما لغاية دلوقتي 99% منهم مبيعرفوش يوصلوا 4 خراطيم فاكيوم بس صح
وييلغوا الباقي بيقولوا ملوش لازمة هههههههههههههه

مين اول من دفع الثمن والقوا عليها سخطهم واتهمموا العربية بالفشل
اول من دفع جهل الصنايعي المصري هو الدايو
وتحديدا النوبيرا واليجانزا. نزلت وقتها بتكنولوجيا لا قبل لهم بها

اخيرا ها هي منظومة الفاكيوم كلها من اولها لآخرها
امام حضراتكم كتااب مفتوح وبالتفصيل الممل

ابقي اشوف حد منكم تاااااني بيسأل عن خراطيم الفاكيوم ومش عارف لازمتها ايه هههههههههههههههههههههههههههههههههههههههه

بهذر معاكم طبعا تحت امركم اي وقت
مع البوست. الرسم الكروكي. المبسط الخاص بالفاكيوم في النوبيرا
وكام صورة فوتوغرافية وبرشور توضح كلامي كله

هذا وما توفيقي الا بالله

اخوكم

خالد قاسم

وتقبلوا تحياتي دائما