حل مشكلة لمبة الباور - Power Light On

Nubira Lovers

29 نوفمبر, 2018

Hamed Khatab

نصيحه مهمه
الناس اللي عندها نوبيرا أوتوماتيك
كهربا وبتعاني من لمبة البور لما بتور
والعربيه بتتقل وفي أوقات تفرمل لوحدها
وتلاقي الصنايعي المحترم يقولك غير فتيس
طب اسمع بقى
علشان محدش يشتغلك
الموضوع كله كنترول فتيس مهيس
ولما بيهيس العربيه بدل ما تطلع على الاول
بتطلع على الرابع
بالعربي كدا لو اللمبه بتنور معاك على طول
والعربيه بتتقل زي البطه البلدي مشكلتك كلها في الكهربا

وأستبعد اي عطل في الفتيس الكهربا
شوية تهيسات مش اكتر من ضعف او خلل في دوائر الكهربا
ومن ضمنها :

1- تمليح فيش كنتروال الفتيس

2- سيلكتورالفتيس

3- حساس ماب

4- قواطيش البطارية

ضعف خارج الكهرباء من الدينمو
أي ضعف في الكهربا بيؤدى الى تهيس كنترول الفتيس او نقص الزيت مما يؤدى الى أضاءة لمبة الباور
وتخلي الفتيس يطلع على رابع بدل الاول يعني بالعربي كدا تبقى عامله زي البطه البلدي
بص يا سيدي هتبدأ بالسهل والأبسط وفي نفس الوقت صيانه وقائيه
1- تكشف على زيت الفتيس لو ناقص زوده بياخد زيت ابيض كهربا
زيت بكود LT 71141 او ما يعادله

(مش شرط يكون لونه أبيض)
*ملحوظه مهمة

لو الزيت ناقص وانت طالع مطلع اللمبه هتنور معاك والعربيه هتطلع رابع بدل أول هتكون تقيله جدا في الطلعه

لو محتاج يتغير غيره
بياخد 4لتر وعلشان محدش يشتغلك ملهوش فلتر بيتغير
ولكن الفلتر موجود داخل الفتيس عمره من عمر الفتيس
وعلشان تغيره يبقى لازم تنزل الفتيس على الأرض
ويتفك كله وتطلع الفلتر
طبعا دا غير الواير خالص
لأن مكانه في قلب الفتيس من جوه وعلشان تغيره عايز صنايعي محترف بس تنضيفه او تغيره هيفرك معاك كتير جدا جدا ولاكن
تغيره هيكون مكلف جدا جدا
وكمان لازم نضيف حاجه
مهمه دورة تبريد الفتيس
مهمه جدا جدا
2- لازم تطمن على تبريد الفتيس
وان الزيت معلوش مياه من سربنتينة تبريد الفتيس ممكن تكون اتخرمت
وممكن تكون مسدوده لو مكتومه مش بتساعد على تبريد زيت الفتيس
لازم ميكانيكي محترف يكشف عليها مع فني ريداتير كويس علشان يقدر يغيرك سربنتينة تبريد الفتيس اللي ركبه في جمب الرداتير من الجنب

3- تنضيف قواطيش البطاريه جيدا والتقريت عليها جيدا
4- فك كنتروال الفتيس وتنضف الفيش بمنظف أليكترونيات علشان ممكن تكون الفيش مملحه فتخلي الاشاره المرسله للفتيس ضغيفه ومكانه موجود تحت الطبلوه جمب الباب اليمين وتفك سيلكتور الفتيس موجود تحت البطاريه وخارج منه فيشه في جسم الفتيس وتنضفه بمنظف أليكترونيات

بعد ما تفكه وتنضفه جيدا وترفع الريش بتاعته شويه وتزود مكان اللحامات قصدير وتنضفه جيدا (يفضل فنى على خبرة كافية)
ودا أهم حاجه في الموضوع كله ممكن تجيبه أستراد وبردو نفس المشكله لازم تفكه
و تنضفه كويس
كهربائي محترم يفيدك في الموضوع دا بس انت كل اللي عليك تفهمه هايعمل ايه
ولو لمبة الأعطال منوره معاك مع الباور يبقى لازم كشف كمبيوتر علشان تطمن على حساس الماب حساس كرنك حساس كامه

4- اي عطل في الدوائر الكهربائيه بيعمل خلل في الاشاره المرسله للفتيس
يعني عايزك تتخيل لو في مشكله في لمبة الاستوب مع دوسة الفرامل بتؤثر على كهربة الفتيس بسبب ماكينة الاستوب
لو بايظه هتخلي لمبة البور تنور معاك
الدينمو لو خرج الكهربا مش مظبوط وفي مشكله بيخلي لمبة البور تنور
البطاريه نفسها لو ضغيفه او فيها مشكله بردو هتخلي لمبة البور تنور ونفس المشكله الفتيس ها يرزع معاك
المهم

أي عطل كهربا عندك في العربيه في مشكله
بيخلي الاشاره المرسله للكنترول تهيس
وبتتسبب في أضاءة لمبة البور
وتبرجل الفتيس معاك
ويبدأ يرزع مع على R و D
وأرجع وأقول تاني
أوعى حد يشتغلك ويقولك
غير فتيس

وان شاءالله مع مرجعه كل هذه الإحتمالات تظبط معاك
وفي نفس الوقت كلها صيانه وقائيه
وتقبلو تحياتي